Sky-High Joe

O Sky-High Joe wis on the go,
   Some gelagnite tae buy,
So he goes to the Carron Iron Works,
   Tae get a guid supply.

CHORUS:  Ricky doodum day, doo dum day,
         Ricky, dicky doo dum day.

Ah need it fur a special job,
   Ah want the real McKay,
Are ye shair yer gelagnite ignites ?
   The Foreman says "Och Aye."

So Sky-High Joe is on the go,
   An back in Edinbro toun,
He catches a tram at the G.P.O.,
   Wi' the Castle frounin doon.

When Joe gets aff at Liberton,
   He gangs intae a shop,
Tae buy some matches - safety yins,
   For Sky-High Joe's nae dope.

Noo Sky-High Joe is on the go,
   As wily as a fox,
He bides his time till he hears the chime,
   Then nips up tae the box.

Whan the Pillar-Box sees Sky-High Joe,
   It blenches deadly pale,
"Staun back, staun back wi yer hair sae black,
   Ah dinna want your air-mail".

But Sky-High Joe is on the go,
   An Joe's nae staunan snash,
So he staps its gob wi' the special job,
   An jouks like a razor flash.

O Sky-High Joe is on the go,
   An may he be fur lang,
An gin they gie us thir snash agin,
   They'll be hearin the same auld sang.

Back to Chapter

Back to Contents List

Embro, Embro
Copyright © 2001, Jack Campin