The Ale Wife's Daughter

Sweet Lassie, bring a Coggie fow,
O' bizzin' Ale, aboon the mow,
An' there's my han' my sonsy dow,
To me ye'll ay be dear.
Come sit beside me, tak' a drink,
An' let me see thee blythly blink,
Thy Minny thro' the House may link,
An' draw the Ale and Beer.

O sic a white an' lily brow,
Or rosey cheeks, wha has like you,
Thy een, my heart gaes thro' an' thro',
They shine sae sweet an' clear.
But dearie! fill the Cog again,
Yet dinna let thy Mither ken,
I wadna for a groat she came,
An' fand me wi' you here.

For ay she bids me pay my score,
Which has been awn a year an' more;
But it's for you, that I adore,
Brings me sae aften here;
An' drink is just the spring o' love,
It lifts a man, a' cares above,
Mak's him in airy circles move,
Whar nane but lovers steer.

Sae let me kiss thy hinny mow,
Far sweeter than my cann I trow,
Come to my arms an' tell me how,
Or where we'll meet again;
O, sweetest armfu' ever man,
Had in his arms since time began,
My deathless saul I'd lay in pawn,
To ca' ye a' my ain.

Then fill the coggie up, my sweet,
The night it blaws baith win' an' weet,
Sae dark an' dirty is the street,
I darna venture hame;
But let it blaw an' rudely rair,
A month or twa, for aught I care,
While in my arms I hae my dear,
The storm I wadna blame.

Back to Chapter

Back to Contents List


Embro, Embro
Copyright © 2001, Jack Campin