October days were snell and clear When Masons, great and sma', The new infirmary to found Filled our Masonic Ha'. But there's nae use for ony new Infirmary ava', Might not the old house yet hae dune Wi' a' the germs awa'? CHORUS: For, noo they've carbolised the house, There's nae germs ava', An' nae corruptions in the house Wi a' the germs awa'. Man's been by vermin fashed for lang, Baith puzhonous an' sma', A flea or a pediculus Is kent to ane and a'. But twasna till the ither day, The deadliest by far Was grippit gaun tae fyle the pus O' ilka open scar. There's Tyndall says o' licht the rays Are naething mair ava' Than coruscations frae the hides O' siccan craturs sma'. The atmosphere's sae fu' o' them That gin ye gie a blaw, The licht an' animalcules baith Are whiskit clean awa'. What signifies a change o' site, Or drainage o' the lands? What for suld architects gang gyte Wi' their pavilion plans? It's no the place, but just the air, Whilk, fu' o' deadly spores, Blaws into every wound an' sair Sic nasty beasts by scores. But ilka bruise an' wound an' sair Wi' antiseptic skill Oor surgeons noo can easy cure Whaur ance they used to kill. Still better, they can stitch an' sew Wi' kippered ligatures - The system takes them up an sae This feeds as weel as cures. In time gane by there's nae a wife Was ever in the straw But warstled for her very life Amang sic atoms sma'. They creepit but an' creepit ben, An' frae their cankerin' power There's not a place ye could defend Conspicuous or obscure. But houdies noo wull be to blame When mithers slip awa' Gin they've no clarified the frame Wi' carbolised aqua. Sae wad ye sing wi proper birr A theme o' modern days, Let antiseptics an' their power Claim a' yer notes o' praise.
Back to Chapter
Back to Contents List
Embro, Embro Copyright © 2001, Jack Campin