Capernaum: Matthew xi, 23

If aa the bluid shed at thy Tron,
   Embro, Embro,
If aa the bluid shed at thy Tron,
Were sped into a river,
It wad caa the mills o Bonnington
   Embro, Embro,
It wad caa the mills o Bonnington
For ever and ever.

If aa the tears that thou hast grat,
   Embro, Embro,
If aa the tears that thou hast grat
Were shed into the sea,
Whaur wad ye find an Ararat,
   Embro, Embro,
Whaur wad ye find an Ararat
Frae that fell flood to flee?


If aa the psalms sung in thy kirks,
   Embro, Embro,
If aa the psalms sung in thy kirks
Were gaithered in a wind,
It wad shog the taps o Roslin birks
   Embro, Embro,
It wad shog the taps o Roslin birks
Till time was out o mynd.

If aa the broken herts o thee
   Embro, Embro,
If aa the broken herts o thee
Were heapit in a howe,
There wad be neither land nor sea,
   Embro, Embro,
There wad be neither land nor sea,
But yon reid brae - and thou!

• Tune gif midi mov

Back to Chapter

Back to Contents List

Embro, Embro
Copyright © 2001, Jack Campin